UNAWEZAJE KUEGESHA TATIZO PEMBENI UKALA RAHA KWANZA?UNAWEZAJE KUEGESHA TATIZO PEMBENI UKALA RAHA KWANZA?

Ni kawaida ya binadamu yeyote mwenye akili timamu anapokumbwa na tatizo kubwa kulibeba katika uzito wake na hivyo kusitisha mipango mingine iliyokuwa kwenye ‘chaneli’.

                                            MFANO HAI

 

Mfano, wazazi mejiandaa kwenda kwenye harusi ambako mnajua mtakula na kunywa na kufurahi sana, lakini ghafla mkiwa huko mnapigiwa simu na binti yenu na kuwaambia kuwa mti umeangukia waya za umeme hivyo nyumbani hakuna umeme.

Mara nyingi katika mazingira haya, wazazi hao lazima wakose raha na kuiona harusi kwao ni chanzo cha matatizo. Hata kule kufurahi na kuserebuka kwa sana hukatika ghafla.

NI KWANINI HUTOKEA?

Kwa kawaida kitu kinachosababisha hali hiyo kutokea ni akili kubeba tatizo na kulilimbikiza kichwani. Mara baada ya kuambiwa mti umeangukia waya za umeme na nyumbani ni giza, sauti itakayokuja kichwani ni hii:

“Sasa itakuwaje giza usiku nyumbani? Da! Ina maana ne joto hili mtalala kweli leo? Halafu wewe umezoea kusikiliza redio usiku si utapata tabu sana, utakuwa hujui nini kianendelea.”

 

“Huu umeme umekatika leo Jumamosi ina maana mpaka Jumatatu, maana Tanesco si hawafanyi kazi Jumapili? Lo! Hapo inamaanisha Jumatatu utakwenda kazini nguo hazijapigwa pasi na bahati mbaya sana huna nguo zinazoweza kuvaliwa bila kupigwa pasi.”

Haya mawazo ndiyo ambayo huondoka kabisa uwepo wa furaha ndani ya moyo.

Wako wanandoa wanashindwa kufanya tendo la ndoa kwa sababu mtoto wao anadaiwa ada shuleni. Kwa hiyo kila akijaribu kuurejesha mwili katika tendo, kuna sauti inasema:

“Wazazi wenzako mtaani sijui watakuelewaje, si watakuuliza ni kwanini siku hizi mwanao haendi shule? Utawajibu anadaiwa ada? Aibu sana, halafu wewe ulivyo smati, unaonekana una fedha lakini kumbe ada tu inakushinda.”

Hii sauti mara nyingi humfanya mtu ashindwe kufikiria kitu kingine. Na watu wenye kuchukuliwa na sauti za namna hii na kuzifanyia kazi huwa wanasumbuliwa na magonjwa kama ya moyo.

NINI CHA KUFANYA?

Kama una mtoto amefukuzwa shule kwa sababu ya ada, kama mzazi unastahili kabisa kufikiria jinsi ya kutafuta fedha za ada, hilo halina ubishi. Lakini linapokuja suala la kufanya jambo ambalo litakupa raha, lazima ulishughulikie.

Hakikisha kila sauti inayokuja kwa lengo la kukupa hofu unaidharau na kuikejeli ukiiambia sitaki kukusikiliza kama ni ada nitapata tu.

Aidha, jitahidi kufikiria mambo yaliyopo kwa wakati huo kuliko kuruhusu mawazo ya mbali. Mfano ni wanandoa, mnaweza kufikia tendo la ndoa na kujikuta mkizama hapo mpaka mtakapomaliza ndipo mkaribishe mambo mengine.

Muda mwingi inapokuja sauti ya hofu ipuuze kwa kutumia njia ya kukumbuka matatizo makubwa yaliyowahi kukupata lakini  yakapita kama vile hayakuwahi kuwepo. Hii itakusaidia kuliona tatizo lililopo ni dogo sana kuliko yaliyopita na hivyo kukufanya uweze kuweka tatizo pembeni na kula raha kwanza.

By mwamfupe ndauka